Cycle

Bin zameen par paanv rakhe,
ek din humney, duniya dekhi thee.
Cycle badi thee lekin,
paanv zaraa chhote reh gaye they.
Ab ek baar jo badi cycle uthaa lee,
chhoti sawaari per jaane ka,
mann kisey thaa.
Paanv zameen per na rakhne ki zidd mein,
kharochein khaa le thee ghutnoon ne.
Har kharonch ke aaj bhi gawaah hain woh galee kooche,
cycle per chadker jinpe, fatah paar ki thee humney.
Bin zameen par paanv rakhe,
ek din humney, duniya dekhi thee.
-------------------------------------
-Prateek
16/6/2012
https://twitter.com/#!/Scotchaholic

Taalaab Kinaare...

Bachpan ki baat hai.
Taalaab kinaare jab hum,
paani mein woh chikne patthar phainka karte they.
Aur ginte they, kitni baar woh patthar,
soye hue uss taalaab ko jagaaega.
Kai saalon ke baad,
ehsaas hua achaanak.
Taalaab ko kabhie jhakjhor kar rakh dene waala patthar
aaj kahin shaant baitha hoga
uss taalaab ki gehraaiyon ke sannate mein.
----------------------------------------------
-Prateek
10/6/2012
https://twitter.com/#!/Scotchaholic

Der Ho Gayi

Ravivaar ko der tak sone waale apne bete ko
subah subah television ke aage baitha dekh
thoda chaunk si gayi thee woh.

"Kya hua Rahul?
Jaldi kaise uth gaya?"

"Ma! TV per naya program aa raha hai.
Ek mashhoor film star
bhroon hatya ke khilaaf
aawaaz utha raha hai."

Sunkar ma thoda hadbadaayi.
"Par beta, doosre channel per achhi picture aa rahi hai.
Chalo. Woh dekhte hain.
Main bhi tumhaare saath bathkar dekh loongi."

"Nahin ma! Picturein toh aati rahengi.
Magar yeh dekho ma.
Kaise kuchh log ladki paida hee nahin hone dete!
Kya inn logon ka dil nahin hota?
Kya inhein aisa kadam uthaane mein darr nahin lagta?
Kaise log hain yeh, chheee!"

Sunkar apne bachche ki baat
chali jaati hai woh apne kamre mein.
Nikaalti hai almaari se woh doctor ki report
jiss per likha tha
'Abortion successful'.
Aaj uske aansoo, ruk na rahe they.
-------------------------------------------------
-Prateek
11/5/2012
https://twitter.com/#!/Scotchaholic

Kuchh Naya, Kuchh Puraana

Dilli nayee aur puraani ho gayi
Hyderabad bhi, khuchh naya, kuchh puraana hai.
Mumbai suburb aur town mein bant gayi
Aadmi ka dil bhala kya bach paaya hai?

Baantne se yaad aaya
ghar ki chhatt se
saamne ke makaan ka woh nazaara.
Aangan mein baithi maa
aur uske chaaron taraf baithe
chaar chhote bachche
nazar lagaaye hue
haath mein maa ke rakhe
ek seb ki taraf.

Bachcho ki khilkhilaahat ke shor mein
lalchaayi aankhon, aur zor ki bhook ke beech
seb bechaara, kya bantne se bach paaya hai?

Hyderabad ka yeh hissa
zaraa naya hai.
Lekin maa ka pyaar abhi bhi
utna hee puraana hai.
-------------------------------------------------
-Prateek Garg
22/3/2012
https://twitter.com/#!/Scotchaholic

The Tree By The River

Yaad hai
kalkal karti, shor machaati
nadi kinaare
woh bargadd ka ped?
Aur tehni si latka
woh uncle ke truck ka tyre?
Tabh hum satrah saal ke they.

Aaj bhi hain wahaan,
woh shor machaati nadi,
woh vishaal bargadd ka ped,
rassi se latka woh truck ka tyre,
Sab kuchh hai wahaan.
Nahin hai, toh bus
tum aur main.
--------------------------------
-Prateek
2/3/2012
https://twitter.com/#!/Scotchaholic