Bik Gaye Kahin

Pata hai kahaan chhupaa rakhaa hai khud ko?
Ya dhoondney ka ab mann nahin karta?
Ya bech diya khud ko bharey baazaar mein?
Chhote chhote sapnon ke keemat badi bhaari,
kaudi kaudi, sikka sikka, umr beetey jaaye saari.
Bech diya re bech diya,
maine hazaar sapnon ko bech diya,
seth ne lagaayi keemat itni pyaari,
uska sapna zara jyada mehenga dikhaai padta hai.
Noton ke beech kahin ek note ban,
pada hoon bandd seth ki tijori mein,
jeb se nikloonga kabhie uska sapna poora karne ko.
Haan bhai, pata hai kahaan chhupa rakhaa hai khud ko.
Bas ab dhoondney ka mann nahin karta.

(Dedicated to all the working class heroes)

Cycle

Bin zameen par paanv rakhe,
ek din humney, duniya dekhi thee.
Cycle badi thee lekin,
paanv zaraa chhote reh gaye they.
Ab ek baar jo badi cycle uthaa lee,
chhoti sawaari per jaane ka,
mann kisey thaa.
Paanv zameen per na rakhne ki zidd mein,
kharochein khaa le thee ghutnoon ne.
Har kharonch ke aaj bhi gawaah hain woh galee kooche,
cycle per chadker jinpe, fatah paar ki thee humney.
Bin zameen par paanv rakhe,
ek din humney, duniya dekhi thee.
-------------------------------------
-Prateek
16/6/2012
https://twitter.com/#!/Scotchaholic