If There Were No Yesterday

Agar kal na hota....
Toh har woh sar
jo maare zillatt ke
jhuka hua hai,
aaj, aasmaan ki ore
utha hota.
Jo aankhein
maare sharam ke
jhuki hui si
kuchh nam si hain,
aaj, sooraj ko
taak rahin hoti.

Agar kal na hota....
subah uth-te hee
na kisi ki yaad sataati
na kisi ka khauf
dil mein hota.
Na pichhlee raat ke nashe se
sar mein dard hota,
aur na hee hota dard, dil mein
pichhli shaam ki
uss bekaar ki behes ko lekar.

Agar kal na hota....
na saath hoti teri yaari,
na saath hoti bewafaai
uss jhoothe yaar ki.
Na hota kisi ko khone ka darr,
na nibhaani padti kasmein
uss jhoothe pyaar ki.

Agar kal na hota
har din, ek naya din hota.
Aur har din hota
ek naya
main.
--------------------------
-Prateek
24/11/2011


https://twitter.com/#!/Scotchaholic