Geeli chikni mitti
lekar apne saath
kai mausam kee barsaat
kuchh mayoos si hai.
"Kab de paoongi main
bachchon ke in khilaunon ko
babuji ki chai ke kulhadd ko
Neema bitiya ki kamar se
lage hue matkey ko aakar?
Kab?"
Mayoos mitti ki udaasi
shayad sooraj dekh raha thaa.
Thoda muskura ke
apna prachand roop dhaaran karke
sokh leta hai
saari narmi
uss geeli mitti se.
"Ab yeh bhi aaram se sahegi
iss duniya ke saare zulm."
Bachche ke haath mein khilauna bankar
aa gayi hai mitti ko ab akad.
Kho dee hai saari narmi
kho dee hai woh maasoomiyatt.
"Maine aisa toh nahin banaana chaaha tha isey..."
sooraj ne socha.
Tabhi hawaa hanske boli
"Dekh sooraj
kaisi utaarti hoom main iski akad"
Aur aisi tez aandhi aayi
chhoot gayi bachche ki
khilaune pe pakad.
Sooraj aur hawaa
dono hee hans rahe hain
zameen per pade unn tukdon per
jo kabhi lekar chalti thee apne saath
kai mausam ki barsaat.
----------------------------------------
-Prateek
11/11/2011
I can relate to this.... in fact, more than anything else i could relate to the entire day.
ReplyDeleteThanks for writing this one, Scotchy!
Keep scribbling.
Thanks mate. It was fun discussing everything under the sun. Looking forward to our next meeting.
ReplyDelete